Italiyalik mutaxassis Antonio Konte Madridning «Real» klubi boshqaruvini qo‘lga olishi mumkin. Insayder Nikola Skiraning ma’lum qilishicha, tomonlar o‘rtasidagi muzokara jarayoni davom etmoqda.
Konte hamda «gallaktikos» prezidenti Florentino Peres 36 soat oldin ikki yillik shartnoma borasidagi muhokamaga kirishishgan. «Real» – Kontening birinchi tanlovi. Qayd etilishicha, kecha u bilan yana ikkita klub bog‘langan.
Eslatib o‘tamiz, «A» Seriyasi yakunlari bo‘yicha «Inter»ni musobaqa chempioni qilgan Konte yakunda jamoani tark etdi. Ma’lum bo‘lishicha, «neradzurri» rahbariyati hamda Antonioning kelajak rejalari bir-biriga to‘g‘ri kelmagan. Shuning uchun u klubni tark etishga qaror qildi.
Ma’lumot uchun, italiyalik mutaxassis faoliyati davomida «Yuventus», «Chelsi» hamda o‘z mamlakatining milliy jamoasida ish yuritgan.
