«Tulkilar» «RB Zalsburg» hujumchisi Patson Dakaning transferini amalga oshirishga yaqin turibdi.

Bu haqda 22 yoshli zambiyalik hujumchining o‘zi Goalga bergan intervyusida bayon qildi.

«Men Angliyaga, «Lester»ga ko‘chib o‘tmoqdaman. «Zalsburg» mening ikkinchi uyimga aylangandi, men bu yerda ajoyib vaqt o‘tkazdim, ammo o‘zgarishning ham payti keldi. Premyer-ligada o‘ynash har doim mening orzuim bo‘lib kelgan», - deydi Daka.

Dakaning transferi «Lester»ga 30 million yevroga tushishi taxmin qilinyapti, bu Avstriya chempionatining yangi transfer rekordi hisoblanadi.

Daka o‘tgan mavsum chempionatning eng yaxshi to‘purari bo‘ldi. Uning hisobida 28 uchrashuvda 27 ta gol mavjud. «Lester»da Patson 34 yoshli Jeymi Vardi o‘rnini to‘ldirmoqchi.