«Тулкилар» «РБ Залцбург» ҳужумчиси Патсон Даканинг трансферини амалга оширишга яқин турибди.
Бу ҳақда 22 ёшли замбиялик ҳужумчининг ўзи Goalга берган интервьюсида баён қилди.
«Мен Англияга, «Лестер»га кўчиб ўтмоқдаман. «Залцбург» менинг иккинчи уйимга айланганди, мен бу ерда ажойиб вақт ўтказдим, аммо ўзгаришнинг ҳам пайти келди. Премьер-лигада ўйнаш ҳар доим менинг орзуим бўлиб келган», - дейди Дака.
Даканинг трансфери «Лестер»га 30 миллион еврога тушиши тахмин қилиняпти, бу Австрия чемпионатининг янги трансфер рекорди ҳисобланади.
Дака ўтган мавсум чемпионатнинг энг яхши тўпурари бўлди. Унинг ҳисобида 28 учрашувда 27 та гол мавжуд. «Лестер»да Патсон 34 ёшли Жейми Варди ўрнини тўлдирмоқчи.
