"Lokomotiv" bilan bellashuvdan so‘ng "Paxtakor" bosh murabbiyi matbuot anjumanida bahs haqida fikrlarini aytib o‘tdi.

- "Paxtakor" va "Lokomotiv" jamoalari ishtirokidagi o‘yin o‘z nomi bilan derbi. Qiziqish katta bo‘ladi. Bugun o‘yinni juda yaxshi boshlay olmadik. Raqib yuqori hududda bizni pressing bilan qarshi oldi. Ayrim urinishlarimiz o‘xshamadi. Birinchi gol muhim pallada urildi deb o‘ylayman. Tanaffusda ba’zi bir narsalarni o‘zgartirdik. Abror Ismoilov maydonga tushgach, o‘yinimizda me’yor yuzaga keldi va bellashuvni nazorat qildik, ikkinchi golni urdik. Oldinda bizni tanaffus kutyapti.

Yo‘ldoshev juda yaxshi o‘yinchi. Mashg‘ulotlarda ishlamoqda. Uning asosiy tarkibda tushmagani ko‘proq tanlovga bog‘liq. Hozir Hojiakbar Alijonov maydonga tushmoqda. Ibrohimxalilga ishonganimiz uchun Akrom Komilov va Vladimir Kozakni boshqa jamoaga berishga qaror qildik.

Har bir murabbiy o‘z mamlakatidan nimadir yangilik olib kirishga intiladi. Masalan, men Yoxan Kroyf uslubini yoqtiraman. Sekeyra ham Joze Mourinyodan nimanidir olishga harakat qilgan deb o‘ylayman. Har bir murabbiy ishlayotgan jamoasida o‘z imzosini ko‘rsatishga urinadi.

Yoshlar raqobatga tayyor turishi kerak. Bugungi o‘yinda to‘p tepgan Humoyunmirzo Iminov o‘tgan uchrashuvda juda yaxshi harakat qilgandi. Uni bugun raqib futbolchilar ko‘p ta’qib qildi. Abror Ismoilov bahsga qo‘shilib, o‘yinni o‘zgartirdi. Yoshlar shu jarayonda o‘sib  borishi kerak. Iminov  aqlliroq va tajribali futbolchilarga qanday o‘ynash lozimligini bugun ko‘rdi. Odil Hamrobekov jamoamizga tez orada qaytadi. Doston Hamdamov borasida aniq gap ayta olmayman.