Avval xabar berganimizdek, «Aston Villa»dan «Man Siti»ga ko‘chib o‘tgan Jek Grilish 10-raqam bilan jamoa sharafini himoya qiladi.
U yangi jamoasidagi ilk fikrlari bilan o‘rtoqlashdi.
«Men «Manchester Siti»ga kelib qo‘shilganimdan juda xursandman. Bu Angliyaning eng yaxshi jamoasi, dunyodagi eng yaxshi murabbiy bilan harakatlanadi. Bu klubga o‘tish shunchaki orzudek tuyulishi mumkin.
Ular so‘nggi 10 mavsumda doimiy ravishda asosiy sovrinlarni qo‘lga kiritishdi. Manchesterga kelgan Gvardiola jamoani keyingi bosqichga olib chiqdi.
«Siti» qurayotgan futbol Yevropadagi eng hayajonli futbol. Pep boshchiligida o‘ynash va yangi narsa o‘rganish - har qanday futbolchi istagan orzu bo‘lsa kerak.
Men, ochig‘ini aytganda, tezroq kirishib olish va hamma bilan tanishishni, debyut o‘yinimni o‘tkazishni sabrsizlik bilan kutyapman», - deya Grilishning so‘zlarini keltiradi klub matbuot xizmati.
