"Qo‘qon-1912" jamoasi superliganing navbatdagi turida, Toshkent shahrida "Bunyodkor" jamoasining mehmoni bo‘ladi. Baxtiyor Ashurmatov shogirdlari mazkur o‘yinga qizg‘in tarzda tayyorgarlik ko‘rishmoqda. Mashg‘ulotlar "Bunyodkor" akademiyasiga qarashli maydonda bo‘lib o‘tmoqda.

10 sentyabr kuni bizni juda qiziqarli o‘yin kutib turibdi. Sababi "shunqorlar" bu yilgi mavsumda safar o‘yinlarida juda yaxshi o‘yin ko‘rsatishmoqda. "Qo‘qon-1912" jamoasi safar o‘yinlarida 14 ochkoni qo‘lga kiritgan va bu borada faqatgina "Paxtakor" dan orqada qolishmoqda. "Shunqorlar" safarda 8 ta o‘yinda maydonga tushishgan va shundan 4 tasida g‘olib bo‘lishgan.

"Bunyodkor" esa joriy mavsumda o‘z maydonida hali yutqazmadi. "Qaldirg‘ochlar" shu kungacha o‘z maydonlarida 6 ta o‘yin o‘tkazishgan va shulardan  4 tasida g‘alaba qozonib, 2 o‘yinda durang natija qayd etishgan.  

"Qo‘qon-1912" jamoasi safardagi muvaffaqiyatli yurishini davom ettirib, "qaldirg‘ochlar"ning o‘z maydonlaridagi dastlabki mag‘lubiyatlarini tan olishga majbur qila olishadimi yoki yo‘qmi? Bu savolga javobni  10 sentyabr kuni bo‘lib o‘tadigan "Bunyodkor" - "Qo‘qon-1912" uchrashuvidan so‘ng bilib olamiz.