Bugun O‘FA birinchi vise-prezidenti Ravshan Ermatov bolalar futbolini rivojlantirish bo‘yicha taniqli nemis mutaxassisi Andrey Vaybert bilan uchrashdi.

Suhbat davomida Ravshan Ermatov har bir jamoaning asosi — akademiyalar va bolalar futboli hisoblanishi, shu sababli mazkur sohani rivojlantirish eng dolzarb vazifalardan biri ekanligini ta’kidladi.

Andrey Vaybert Markaziy Osiyo davlatlari ichida O‘zbekistonda bu yo‘nalishga e’tibor yuqori ekanligini e’tirof etdi. Shuningdek, futbolchilarni tayyorlashning maxsus tizimlarini joriy etish, jismoniy va ruhiy tayyorgarlik, turli yosh toifasida o‘smirlar o‘rtasida musobaqalarni o‘tkazish borasidagi Germaniya tajribasi bilan o‘rtoqlashdi.

Ravshan Ermatov Andrey Vaybertga tegishli Germaniyadagi akademiyalarning faoliyati va infrastrukturalarini o‘rganish, o‘zbekistonlik murabbiylarni amaliyotga jalb qilish, iqtidorli, yosh futbolchilarimizni tajriba almashish uchun Germaniya akademiyalariga yuborish borasida o‘z takliflarini bildirdi.

O‘z navbatida, nemis mutaxassisi kelajakdagi istiqbolli loyihalarni birgalikda amalga oshirishga doimo tayyor ekanligini ta’kidladi.