Belgraddagi boks bo‘yicha jahon chempionatida nimchorak final bosqich janglari yakuniga yetdi. 80 kilo vazn toifasida Odiljon Aslonov chorak final yo‘llanmasi uchun AQSHdan tashrif buyurgan Robbi Gonsales qarshi ringga ko‘tarildi.

Raqib bo‘y va qo‘llarining uzunligi jihatdan ustunlikka ega bo‘lsa-da, ikkinchi raqam ostida ishlashadi. Hamyurtimiz esa ring markazini egallab, raqibiga bosim o‘tkazdi. Taym so‘ngida Aslonovning harakatlari samarali chiqdi va raqibini nokdaunga tushirdi. Natijada u bo‘limni o‘z foydasiga hal qildi. Hakamlarning 4 nafari o‘zbekistonlik bokschiga ustunlikni berdi.

Ikkinchi bo‘limda amerikalik o‘z uslubini o‘zgartirib, yaqin masofada ishlay boshladi. Bu taymda hakam har ikki sportchini bir martadan ogohlantirdi.

Uchinchi bo‘limda esa tomonlar ochiq jangga kirishishdi. Har ikkisi ham ko‘plab aniq zarbalar berishga muvaffaq bo‘ldi. Yakunda esa hakamlar g‘alabani Gonsalesga tortiq etishdi — 2:3 (27:28, 27:28, 28:27, 27:28, 28:27).

Shu tariqa, 7 nafar boksimiz chorak finalga qadar musobaqani tark etishdi. Olti nafar sportchimiz medallar uchun o‘z ishtirokini davom ettiradi.