Белграддаги бокс бўйича жаҳон чемпионатида нимчорак финал босқич жанглари якунига етди. 80 кило вазн тоифасида Одилжон Аслонов чорак финал йўлланмаси учун АҚШдан ташриф буюрган Робби Гонсалес қарши рингга кўтарилди.

Рақиб бўй ва қўлларининг узунлиги жиҳатдан устунликка эга бўлса-да, иккинчи рақам остида ишлашади. Ҳамюртимиз эса ринг марказини эгаллаб, рақибига босим ўтказди. Тайм сўнгида Аслоновнинг ҳаракатлари самарали чиқди ва рақибини нокдаунга туширди. Натижада у бўлимни ўз фойдасига ҳал қилди. Ҳакамларнинг 4 нафари ўзбекистонлик боксчига устунликни берди.

Иккинчи бўлимда америкалик ўз услубини ўзгартириб, яқин масофада ишлай бошлади. Бу таймда ҳакам ҳар икки спортчини бир мартадан огоҳлантирди.

Учинчи бўлимда эса томонлар очиқ жангга киришишди. Ҳар иккиси ҳам кўплаб аниқ зарбалар беришга муваффақ бўлди. Якунда эса ҳакамлар ғалабани Гонсалесга тортиқ этишди — 2:3 (27:28, 27:28, 28:27, 27:28, 28:27).

Шу тариқа, 7 нафар боксимиз чорак финалга қадар мусобақани тарк этишди. Олти нафар спортчимиз медаллар учун ўз иштирокини давом эттиради.