Саудия Арабистонининг «Ал-Ҳилол» клуби «Пари Сен-Жермен» ҳамда Франция миллий жамоаси ҳужумчиси Усмон Дембелега жиддий қизиқиш билдирмоқда. Бу ҳақда инсайдер Саша Тавольери хабар берди.

Манбанинг ёзишича, Крисенсио Саммервилл трансферидан сўнг саудияликлар яна бир юлдуз футболчини ўз сафига қўшиб олишни режалаштирмоқда. «Ал-Ҳилол» Дембелени харид қилиш имкониятини ўрганиш мақсадида унинг вакиллари билан дастлабки алоқани ўрнатган.

Ҳозирча «ПСЖ» билан расмий музокаралар бошланмаган. Аввало, саудияликлар 29 ёшли француз футболчисининг розилигини олишни истамоқда. Агар 2025 йилги «Олтин тўп» соҳиби таклифга ижобий муносабат билдирса, «Ал-Ҳилол» парижликлар билан трансфер шартларини муҳокама қилишни бошлайди. Шу билан бирга, Франция чемпиони ўз етакчисини сақлаб қолиш ниятида бўлиб, унга янги шартнома таклиф қилишни режалаштирган.

Дембеле клублар миқёсида фаолияти давомида 421 та учрашувда майдонга тушиб, 136 та гол урган ва 110 та голли узатмани амалга оширган. У фаолияти давомида «Ренн», Дортмунднинг «Боруссия»си, «Барселона» ва «Пари Сен-Жермен» шарафини ҳимоя қилган.

Француз футболчиси бой совринлар тўпламига эга. У «Боруссия» билан Германия кубогини қўлга киритган. «Барселона» сафида уч марта Испания чемпиони бўлган, икки марта Испания кубоги ва икки марта Испания Суперкубогида ғолиб чиққан.

«ПСЖ» билан эса уч марта Франция чемпиони, икки марта Франция кубоги, уч марта Франция Суперкубоги соҳиби бўлган. Шунингдек, УЕФА Суперкубоги ва ФИФА Қитъалараро кубогини ҳам ютиб олган. 2024/25 ва 2025/26 мавсумларида парижликлар кетма-кет икки марта Чемпионлар лигаси ғолиби бўлишган.

Халқаро майдонда Дембеле Франция миллий жамоаси билан 2018 йилги жаҳон чемпиони бўлган. 2025 йилда у «Олтин тўп» мукофотини қўлга киритди, шундан сўнг ФИФА томонидан йилнинг энг яхши футболчиси деб эътироф этилди.