Профессионал бокснинг супер оғир вазн тоифаси вакили, ўзбекистонлик Баҳодир Жалолов профессионал рингдаги навбатдаги жангини 17 октябрь куни ўтказади. Унинг рақиби британиялик Соломон Дакрес бўлади.

Машҳур инсайдер Ден Рафаэлнинг хабарига кўра, Жалолов 17 октябрь куни Лондон шаҳридаги “О2 Арена”да ўтказиладиган Даниэль Дюбуа — Фабио Уордли жанги кечасида рингга кўтарилади. Жалолов — Дакрес жанги асосий жанг олдидан ўтказиладиган баҳслардан бири бўлиши кутилмоқда.

Томонлар жангни ўтказиш бўйича келишувга эришган. Жалоловнинг промоутери Топ Ранк, Дакреснинг промоутери эса Queensberry компанияси ҳисобланади.

32 ёшли Баҳодир Жалолов профессионал боксда мағлубияциз фаолият юритмоқда. У профессионал боксда 17 та жанг ўтказиб, Шуларнинг 15 тасини муддатидан аввал якунлаган.

Жалолов сўнгги жангини 9 май куни Манчестерда ўтказган. Ўшанда у хорватиялик Агрон Смакичини нокаутга учратганди.

Унинг рақиби Соломон Дакрес профессионал боксда 10 та ғалаба ва битта мағлубият қайд этган. Британиялик боксчи ушбу жангларнинг учтасида рақибларини нокаут билан мағлуб этган.

Бундан ташқари, ўзбекистонлик спортчи ҳаваскор боксда ҳам катта натижаларга эришган. У 2020 ва 2024-йилларда Олимпия ўйинлари чемпиони бўлган. Шунингдек, 2019 ва 2023-йилларда Жаҳон чемпионлигини қўлга киритган.