Нуфузли Transfermarkt статистик портали 2026 йилги жаҳон чемпионати давомида мухлислар қизиқиши бўйича якунларни эълон қилди ҳамда сайт фойдаланувчилари томонидан энг кўп кўрилган футболчилардан иборат рамзий терма жамоани тақдим этди.

Дунёнинг энг нуфузли турнирида энг кўп кўрилган ўн бир нафар футболчи қаторига Ўзбекистон миллий терма жамоаси ва Англиянинг «Манчестер Сити» клуби марказий ҳимоячиси, 22 ёшли Абдуқодир Ҳусанов ҳам кирди. Футболчи ҳимоя марказидан жой олди, унинг Transfermarkt порталидаги бозор қиймати эса 50 миллион еврога баҳоланмоқда.

Рамзий терма жамоанинг умумий трансфер қиймати 281 миллион еврога тенг бўлди. Ҳимоя чизиғида Ҳусанов билан бирга испаниялик Марк Кукурелья («Реал», 50 млн евро), нидерландиялик Натан Аке («Фенербахче», 12 млн евро) ва Кабо-Верде терма жамоаси вакили Лопес Кабрал («Трабзонспор», 4 млн евро) жой олди. Дарвозабон позициясини эса Кабо-Верде вакили, тажрибали Возинья (50 минг евро) эгаллади.

Ярим ҳимоя ва ҳужум чизиғидан афсонавий ҳужумчилар Лионель Месси («Интер Майами», 15 млн евро) ва Криштиану Роналду («Ан-Наср», 10 млн евро), мисрлик вингер Муҳаммад Салоҳ (22 млн евро), бельгиялик Леандро Троссард («Бешиктош», 18 млн евро), шунингдек, ўзини яхши томондан кўрсатган ёш истеъдодлар — швейцариялик Йоан Манзамби («Астон Вилла», 50 млн евро) ҳамда марокашлик Аюб Буадди («Лилль», 50 млн евро) ўрин олди.