Ayollar jamoalari o‘rtasidagi Osiyo Chempionatida ishtirok etayotgan “Bunyodkor-W” bugun Iordaniyaning "Amman-W" jamoasiga qarshi bahs olib bordi va g‘alabaga erishdi. Uchrashuvdagi yagona golni jamoamiz hujumchisi Dildora Nizomova 90+1 daqiqada kiritdi.

Uchrashuvdan so‘ng o‘yinning eng yaxshi futbolchisi deb topilgan Umida Zoirova matbuot anjumanida ishtirok etdi.

— G‘alaba bilan tabriklaymiz. O‘yin haqidagi fikrlaringiz.
— Tabrik uchun rahmat. Birinchi o‘yinda xalqaro darajadagi dastlabki o‘yinimiz bo‘lganligi sababli ko‘proq hayajonlandik va yakunda alamli mag‘lub bo‘ldik. Bugungi o‘yinda esa xatolarimiz ustida ishladik, dastlabki mag‘lubiyatni unutgan holda, qiyin o‘yin bo‘lishiga qaramasdan g‘alaba qozondik.

— Birinchi bo‘limda yaxshi futbol namoyish etdingiz, lekin ikkinchi bo‘limda qiziqqonlik bilan o‘ynadingizlar. Murabbiy tanaffusda nimalar dedi?
— Murabbiy bunday ko‘rsatma bermadi. Shunchaki, birinchi bo‘limda ko‘plab vaziyatlardan foydalana olmadik, shu holat bizni asabiylashtirgan bo‘lishi mumkin va ikkinchi bo‘limda qanday qilib bo‘lmasin yutishimiz shartligini his qilib o‘ynadik va yakunda g‘alaba qozondik.

— Muxlislarga tilaklaringiz...
— Bizni qo‘llab-quvvatlab turgan klubimiz prezidenti va rahbariyatimizga, bizga muxlislik qilib dalda berayotgan barchaga minnatdorchilik bildiraman. Biz nafaqat  “Bunyodkor” jamoasi uchun, shu bilan birga O‘zbekiston sha’ni uchun o‘ynayaapmiz. Shu sababdan barcha O‘zbekiston ahlini bugungi g‘alaba bilan tabriklayman.