«Tottenxem» hujumchisi va Angliya terma jamoasi sardori Harri Keyn yanvar oyidagi transfer oynasida «Manchester Siti» futbolchisiga aylanishi mumkin, deb xabar beradi ESPN.
Manbaga ko‘ra, o‘tgan yozda London klubi rahbariyati ingliz uchun «shaharliklar»dan 150 million yevro talab qilgan. Qayd etilishicha, «shaharliklar» rahbariyati «shporlar» prezidenti narxni pasaytirib, futbolchini kamroq pul evaziga qo‘yib yuborishiga umid qilmoqda.
Biroq, manbaga ko‘ra, londonliklar prezidenti Deniyel Levi jamoa yetakchisi uchun faqatgina «katta taklif»ni qabul qilishga tayyor, chunki «Tottenxem»ning budjeti koronavirus pandemiyasi tufayli sezilarli darajada qisqargan.
Joriy mavsumda Keyn «Tottenxem» safida barcha turnirlarda 14 ta o‘yin o‘tkazib, 7 ta gol urdi va bitta golli uzatmani amalga oshirdi.
