Osiyo futbol Konfederasiya musobaqalarni o‘tkazish bo‘limi boshlig‘i, hamyurtimiz Avaz Berdiqulov ayollar klublari o‘rtasidagi Osiyo chempionati-2021 musobaqasini o‘tkazish uchun Iordaniyaning Aqaba shahriga kelgan. O‘zPFL matbuot xizmati ayollar futboli va OFKning ushbu yo‘nalish bo‘yicha rejalari haqida qiziqdi.

- OFK ushbu turnirni ikkinchi marta o‘tkazdi. Birinchi marta 2019 yil tashkillashtirilgan edi.

Ayollar klublari o‘rtasidagi Osiyo chempionatini o‘tkazishdan asosiy maqsad — jamoalarning qanchalik tayyorligi, ularga qay darajada bu turnir qiziqarli ekanligini ko‘rish edi.

Ilk bor bu turnirni 2019 yil birinchi beshlikka kiradigan davlatlar jamoalari uchun tashkil qilgan edik. Xitoy, Janubiy Koreya, Avstraliya va Yaponiya davlatlaridan ayollar futbol klublari qatnashgan.

Koronavirus pandemiyasi sababli 2020 yilda bu musobaqa o‘tkazilmadi.

2021 yilda esa ASEAN va G‘arbiy zonadan bittadan guruh bo‘lishi kerak edi. Laos, Vyetnam, Indoneziya va Tailand jamoalari o‘z davlatlarida pandemiya davom etayotgani sababli joriy yil turnirda ishtirok eta olmadi.

Reja bo‘yicha har ikki guruh chempioni 23 noyabr kuni Ar-Riyodda o‘tadigan erkaklar Osiyo Chempionlar ligasi final uchrashuvi boshlanishidan oldin huddi shu stadionda, erkaklar finalida hukm suradigan atmosferada katta final uchrashuvini o‘tkazish edi. Bu futbolchi qizlar uchun katta motivasiya bo‘lar edi. Bundan tashqari, shu o‘yin orqali kelajakda o‘tkazilishi rejalashtirilayotgan ayollar Chempionlar ligasi musobaqasiga katta kompaniyalarning qiziqishini orttirish, turnirga homiylar topish uchun yaxshi imkoniyat bo‘lar edi. Ushbu rejani keyingi yilga amalga oshirishga harakat qilamiz.

Joriy yilgi turnirda barcha jamoalar chiroyli va shiddatli o‘yin ko‘rsatishdi. Barcha jamoalar g‘olib bo‘lishga bor kuchlari bilan harakat qilishdi. Bu bizni quvontirdi.