Bugun O‘FA birinchi vise-prezidenti Ravshan Ermatov Qoraqalpog‘iston Respublikasi, viloyatlar va Toshkent shahar akademiyalari rahbarlari va tibbiyot xodimlari, shuningdek, taniqli sport diyetologlari va turli yoshdagi jamoalarning tibbiyot xodimlari ishtirokida onlayn uchrashuv o‘tkazdi.
Yig‘ilish avvalida har qanday jamoaning asosini akademiya va bolalar futboli tashkil etishi, shuning uchun ham bolalarning jismoniy va psixologik holati birinchi o‘rinda turishi kerakligi ta’kidlandi.
«Biz yillar davomida bunga yetarlicha e’tibor bermadik. O‘zbek futbolining kelajagi yo‘lida rivojlangan xorijiy davlatlar tajribasidan kelib chiqib, mamlakatimizning barcha akademiyalari uchun mo‘ljallangan yagona tibbiyot tizimini ishlab chiqish zarur, farzandlarimiz Yevropadagi tengdoshlaridan hech qanday kam bo‘lmasligi, jismonan sog‘lom bo‘lib yetishishlari va ruhan futbolchilik faoliyatiga tayyor bo‘lishlari lozim», — dedi Ravshan Ermatov.
Uchrashuv davomida mutasaddilarga akademiyalarda kompleks vitaminizasiyani yo‘lga qo‘yish, musobaqalarga jismoniy tayyorgarlik ko‘rish va futbolchilarning ovqatlanish jarayonini alohida nazorat ostiga olish bo‘yicha topshiriqlar berildi.
Shuningdek, mazkur yo‘nalishda tibbiyot xodimlarining maslahatlari bo‘yicha ishchi guruh tuzishga kelishib olindi. Bu borada malakali mutaxassislarni jalb etish va akademiyalar bilan birgalikda muntazam ravishda onlayn o‘quv seminarlar o‘tkazib borishga kelishib olindi.
