Бугун ЎФА биринчи вице-президенти Равшан Эрматов Қорақалпоғистон Республикаси, вилоятлар ва Тошкент шаҳар академиялари раҳбарлари ва тиббиёт ходимлари, шунингдек, таниқли спорт диетологлари ва турли ёшдаги жамоаларнинг тиббиёт ходимлари иштирокида онлайн учрашув ўтказди.
Йиғилиш аввалида ҳар қандай жамоанинг асосини академия ва болалар футболи ташкил этиши, шунинг учун ҳам болаларнинг жисмоний ва психологик ҳолати биринчи ўринда туриши кераклиги таъкидланди.
«Биз йиллар давомида бунга етарлича эътибор бермадик. Ўзбек футболининг келажаги йўлида ривожланган хорижий давлатлар тажрибасидан келиб чиқиб, мамлакатимизнинг барча академиялари учун мўлжалланган ягона тиббиёт тизимини ишлаб чиқиш зарур, фарзандларимиз Европадаги тенгдошларидан ҳеч қандай кам бўлмаслиги, жисмонан соғлом бўлиб етишишлари ва руҳан футболчилик фаолиятига тайёр бўлишлари лозим», — деди Равшан Эрматов.
Учрашув давомида мутасаддиларга академияларда комплекс витаминизацияни йўлга қўйиш, мусобақаларга жисмоний тайёргарлик кўриш ва футболчиларнинг овқатланиш жараёнини алоҳида назорат остига олиш бўйича топшириқлар берилди.
Шунингдек, мазкур йўналишда тиббиёт ходимларининг маслаҳатлари бўйича ишчи гуруҳ тузишга келишиб олинди. Бу борада малакали мутахассисларни жалб этиш ва академиялар билан биргаликда мунтазам равишда онлайн ўқув семинарлар ўтказиб боришга келишиб олинди.
