Qadrli bekobodliklar, aziz futbol ixlosmandlari! Millionlar o‘yini – futbolga kirib kelganimga yigirma yildan oshdi. Faoliyatim davomida ko‘plab muhim uchrashuvlarda maydonga tushdim. O‘zbekiston milliy terma jamoasiga jalb etildim. Serquyosh Vatanimiz, qadrdon shahrim – Bekobod sharafini qo‘limdan kelgunicha, baholi qudrat himoya etdim. Bir necha yillar jamoamizning to‘purari bo‘ldim. Bekobodlik futbolchilar orasida birinchi bo‘lib raqiblar darvozasiga 100 dan ziyod gol kiritdim. "Gennadiy Krasniskiy klubi" a’zosiga aylandim.

Ammo rostini aytaman, faoliyatim davomida shu yilgi - 2021 yilgi mavsumning Bekoboddagi oxirgi uchrashuvi – Superliga debyutanti "Turon" jamoasiga qarshi bahschalik muhim o‘yin bo‘lmagan. Barchamiz uchun qadrdon bo‘lgan "Metallurg" jamoamiz kuchlilar safidagi mavqeini saqlab qolish uchun kurashayapti. Bizga qolgan ikki uchrashuvda G‘ALABA – ochkolar suv va havodek zarur! G‘alabani qo‘lga kiritish yo‘lida esa biz Sizlarning – jamoamizning o‘n ikkinchi o‘yinchisining yordamiga muhtojmiz. Agarda Siz azizlar 2021 yilning 21 noyabr kuni soat 16:00 dan "Metallurg" markaziy stadioniga kelsangiz, tribunalarni to‘ldirib o‘tirsangiz, to‘qson daqiqa davomida yigitlarimizni tinmay qo‘llab quvvatlab tursangiz, barchamiz uchun muhim bo‘lgan vazifani bajarish osonroq kechadi. Siz azizlarning ruhiy madadingiz yigitlarimizga qo‘shimcha kuch, quvvat bag‘ishlaydi. Motivasiyani oshiradi. Barchamiz orziqib kutayotgan G‘ALABA eshiklari ochiladi, In Sha Alloh!

Shu o‘rinda eslatib o‘taman, 25-turdan o‘rin olgan "Turon" jamoasiga qarshi o‘yin soat 16:15 da boshlanadi. Stadion eshiklari barcha xoxlovchilar – aziz muxlislarimiz uchun ochiq. Uchrashuvga kirish bepul.