Қадрли бекободликлар, азиз футбол ихлосмандлари! Миллионлар ўйини – футболга кириб келганимга йигирма йилдан ошди. Фаолиятим давомида кўплаб муҳим учрашувларда майдонга тушдим. Ўзбекистон миллий терма жамоасига жалб этилдим. Серқуёш Ватанимиз, қадрдон шаҳрим – Бекобод шарафини қўлимдан келгунича, баҳоли қудрат ҳимоя этдим. Бир неча йиллар жамоамизнинг тўпурари бўлдим. Бекободлик футболчилар орасида биринчи бўлиб рақиблар дарвозасига 100 дан зиёд гол киритдим. "Геннадий Красницкий клуби" аъзосига айландим.

Аммо ростини айтаман, фаолиятим давомида шу йилги - 2021 йилги мавсумнинг Бекободдаги охирги учрашуви – Суперлига дебютанти "Турон" жамоасига қарши баҳсчалик муҳим ўйин бўлмаган. Барчамиз учун қадрдон бўлган "Металлург" жамоамиз кучлилар сафидаги мавқеини сақлаб қолиш учун курашаяпти. Бизга қолган икки учрашувда ҒАЛАБА – очколар сув ва ҳаводек зарур! Ғалабани қўлга киритиш йўлида эса биз Сизларнинг – жамоамизнинг ўн иккинчи ўйинчисининг ёрдамига муҳтожмиз. Агарда Сиз азизлар 2021 йилнинг 21 ноябрь куни соат 16:00 дан "Металлург" марказий стадионига келсангиз, трибуналарни тўлдириб ўтирсангиз, тўқсон дақиқа давомида йигитларимизни тинмай қўллаб қувватлаб турсангиз, барчамиз учун муҳим бўлган вазифани бажариш осонроқ кечади. Сиз азизларнинг руҳий мададингиз йигитларимизга қўшимча куч, қувват бағишлайди. Мотивацияни оширади. Барчамиз орзиқиб кутаётган ҒАЛАБА эшиклари очилади, Ин Ша Аллоҳ!

Шу ўринда эслатиб ўтаман, 25-турдан ўрин олган "Турон" жамоасига қарши ўйин соат 16:15 да бошланади. Стадион эшиклари барча хохловчилар – азиз мухлисларимиз учун очиқ. Учрашувга кириш бепул.