Fransiya chempionatining 14-turidan o‘rin olgan «Lion» va «Marsel» jamoalari o‘rtasidagi uchrashuvni boshqarib borgan hakam Ruddi Bukke o‘yinda yuz bergan hodisa sabab o‘yinni nima uchun to‘xtatishga qaror qilganiga izoh berdi.

Eslatib o‘tamiz, bahsning ilk daqiqalarida mehmonlar yarim himoyachisi Dmitri Payet burchak zarbasini o‘yinga kiritishga tayyorgarlik ko‘rayotgan paytda tribunadan uloqtirilgan suv idish uning boshiga tegdi. Hakam esa o‘yinni bekor qildi va jamoalarni tribuna ostiga olib kirib ketdi. Oradan 2 soat o‘tib bahsni butunlay bekor qilish haqida qaror qabul qilindi. «Lion» prezident Jan-Mishel Olaning aytishicha, referi bahsni davom ettirmoqchi bo‘lgan, ammo «Marsel» vakillarining bosimi ostida o‘z qarorini o‘zgartirgan.

«Barchasi boshqacha bo‘lishini istagandik, ammo men avval boshdanoq o‘yinni davom ettirmaslik haqida qaror qabul qildim. Yig‘ilish paytida muxlislar tomonidan tartibsizlik yuzaga kelish xavfi borligi tilga olindi. Birinchi navbatda shuni inobatga oldik. Ishonchim komil, o‘yinni davom ettirmaslik haqidagi qarorim to‘g‘ri edi.

Men bunday qarorni ochiq-oydik soprt sabablariga ko‘ra qabul qildim. Xavfsizlik borasida ko‘p omillarni inobatga olish kerak edi: to‘la stadion, o‘yinchilarni evakuasiya qilish… Ammo yakuniy qarorni men qabul qildim», — dedi Bukke.