Avval xabar berganimizdek, O‘zbekiston futbol assosiasiyasi tomonidan mamlakatimizda murabbiy, selesioner (skaut), tahlilchi, hakam, marketolog, psixolog va futbol menejeri kabi yuqori malakali futbol mutaxassislarini tayyorlash, qayta tayyorlash va malakasini oshirish borasida qator tizimli ishlar amalga oshirib kelinmoqda.

Ushbu yo‘nalishlarda markaz tashkil etilib, xorijiy va mahalliy tajribali mutaxassislar yordamida o‘zbek futbolining turli sohalarida faoliyat yuritadigan yetuk kadrlarni tayyorlash maqsad qilingan.

Ayni kunlarda Toshkent shahrida O‘FAning “C” lisenziyasi bo‘yicha murabbiylik kursi davom etmoqda. Mazkur kursda 18 nafar murabbiylar 6 kun davom mutaxassislaridan o‘z sohalariga oid tajriba va ko‘nikmalarini egallab borishmoqda. Darslarda instruktorlik vazifasini Shamil Iseev bajarmoqda. Unga Dauletbay Djalimov assistentlik qilmoqda. Koordinator vazifasini esa Rustam Tagayev bajarmoqda.

Bugun O‘FA birinchi vise-prezidenti Ravshan Ermatov ushbu kursning navbatdagi seminariga tashrif buyurdi.

“Bolalar futbolidagi murabbiylarning ertangi kunimizdagi roli juda katta. Shu sababli har bir murabbiy bilimli va o‘z ishining ustasi bo‘lishi, zamonaviy tendensiyalarni futbolda qo‘llay olishi zarur. Bu yo‘lda O‘FA doimiy ravishda ularni o‘qitib borishga sharoit yaratib beradi va bunday seminarlarni doimiy tashkillashtirib boradi” dedi Ravshan Ermatov.

Ma’lumot uchun, kurs davomida murabbiylarga nazariy va jismoniy mashg‘ulotlar o‘rgatiladi. Aytib o‘tish lozim, imtihonlarni muvaffaqiyatli topshirgan nomzodlar 3 yilga mo‘ljallangan O‘FAning murabbiylik bo‘yicha “C” lisenziyasini qo‘lga kiritadilar.