Mana hash-pash deguncha 2021 yilgi futbol mavsumi ham o‘z yakuniga yetdi. Barcha jamoalar o‘z harakatlariga yarasha turnir jadvalida o‘rinlariga ega bo‘lishdi. Kimdur oldiga qo‘ygan vazifani bajardi, kimdur bajara olmadi. Futbol shunisi bilan qiziq. Kutilmagan natijalar, alamli mag‘lubiyatlar va his-hayajonga boy quvonchli g‘alabalar. Futbol bularning barchasi bilan go‘zal.
“Qo‘qon-1912” jamoasi ham o‘tgan mavsumni baholi qudrat o‘tkazdi. “Shunqorlar” o‘tgan mavsum superliga o‘yinlarida 9 g‘alaba, 9 durang va 8 ta o‘yinda mag‘lubiyat qaydi etishdi. To‘plar nisbati 37-36 , jamg‘arilgan ochkolar soni 36 ta va turnir jadvalida 8 o‘rin qo‘lga kiritildi. Safardagi o‘yinlarda Baxtiyor Ashurmatov shogirdlari 21 ta ochko ishlashdi va bu borada “Paxtakor”dan keyin 2-o‘rindagi natijani qayd etishdi. To‘g‘ri jamoa o‘z oldiga qo‘ygan vazifani qaysidur ma’noda uddalay olmagandur, biroq futbolchilar bu yilgi mavsumni yomon o‘tkazishdi deya olmaymiz.
“Shunqorlar” o‘tgan mavsum davomida bir nechta tarixiy natjalarni yangilay olishdi. Masalan bu yil superligadagi eng ko‘p “golli seriya” (18 o‘yin) Ashurmatov shogirdlariga tegishli bo‘ldi. “Qo‘qon-1912” jamoasi so‘nggi bor, 2 may 2021 yil kuni , 8-turda Toshkentda “Paxtakor” darvozasiga yo‘l topa olishmagan. Shundan so‘ng o‘tgan barcha o‘yinlarda futbolchilar raqiblar darvozasiga gol kiritishni uddalashdi.
Superliganing 19-tur uchrashuvini Bekobod shahrida “Metallurg” jamoasiga qarshi o‘tkazgan “Qo‘qon-1912” jamoasi, Ivan Yosovichning goli evaziga 0-1 hisobida g‘alaba qozondi. Bu g‘alaba tarixiy g‘alaba edi . Bekobodda so‘ngi marta Qo‘qonlik futbolchilar 2002 yil 23 mart kuni, oliy liganing 2 tur o‘yinida 0-2 hisobida g‘alaba qozongan edi. Shuningdek, superliga 21-turidan o‘rin olgan “Paxtakor” jamoasiga qarshi bo‘lib o‘tgan o‘yinda 4-2 hisobida g‘alaba qozongan qo‘qonliklar, “Paxtakor”ga qarshi O‘zbekiston chempionati o‘yinlaridagi 18 yillik g‘alabasiz o‘yinlar qora an’anasiga barham berishdi. Qolaversa “Paxtakor” darvozasiga so‘nggi yillarda hech qaysi jamoa 4 ta gol kirita olmagan. Shuningdek so‘ngi turda Namanganda “Navbahor” jamoasi ustidan 2-3 hisobida g‘alaba qozongan "shunqorlar" yana bir hech qaysi jamoa futbolchilari amalga oshira olmagan vazifani uddalay olishdi, ya’ni bu mavsumda hech bir jamoa O‘tkir Yusupov darvozasiga bir o‘yinda 3 ta gol kirita olmagan edi.
Xulosa qilib aytadigan bo‘lsak, Qo‘qonlik futbolchilar mavsum davomida o‘z muxlislariga ko‘plab quvonchli va hayajonli daqiqalarni taqdim eta olishdi.
