UYEFA Konferensiyalar ligasi musobaqasini yo‘lga qo‘ygach, Yevropa ligasi turniri pley-off bosqichiga kichik o‘zgarish yuz berdi. Guruh bosqichida peshqadamlikni qo‘lga kiritgan jamoalar to‘g‘ridan-to‘g‘ri nimchorak final bosqichiga yo‘l olishgan bo‘lsa, qolgan 8ta klub 1/16 final deb nomlangan o‘tish bahslarida ishtirok etishadi.

Guruhda 2-o‘rinni egallaganlar bu bosqichda Yevropa chempionlar ligasi guruh bosqichida 3-o‘rinni egallagan klublar bilan to‘qnash kelishadi. Bugun esa aynan mazkur bosqichga qur’a tashlash marosimi bo‘lib o‘tadi.

Qachon?
Qur’a tashlash marosimi bugun — 13 dekabr, dushanba kuni UYEFA qarorgohi joylashgan Nyon shahrida bo‘lib o‘tadi. Tadbir Toshkent vaqti bilan 17:00da boshlanadi.

Ishtirokchi-jamoalar
Yuqorida aytib o‘tganimizdek, qur’ada 16ta jamoa ishtirok etadi. Yevropa ligasi guruh bosqichida 2-o‘rinni egallaganlar 1-savatchadan, YECHLdan o‘tgan klublar esa 2-savatchadan o‘rin olishadi.

1-savatcha:
"Betis" (Ispaniya)
"Braga" (Portugaliya)
"Dinamo" Zagreb (Xorvatiya)
"Lasio" (Italiya)
"Napoli" (Italiya)
"Olimpiakos" (Gresiya)
"Real Sosyedad" (Ispaniya)
"Reynjers" (Shotlandiya)

2-savatcha:
"Atalanta" (Italiya)
"Barselona" (Ispaniya)
"Borussiya" Dortmund (Germaniya)
"Zenit" (Rossiya)
"Portu" (Portugaliya)
"RB-Leypsig" (Germaniya)
"Sevilya" (Ispaniya)
"Sherif" (Moldova)

Cheklovlar bormi?
Ha. Bir mamlakat vakillari ushbu bosqichda o‘zaro to‘qnash kelishmaydi.

Nechta o‘yin?
1/16 final bosqichida jamoalar uy va safar tizimida ikki martadan to‘qnash kelishadi. 1-savatcha vakillari javob bahsini o‘z uylarida o‘tkazishadi. Pley-off bosqichida "safarda urilgan gol" qoidasi amalda bo‘lmaydi.

O‘yinlar qachon o‘tkaziladi?
Dastlabki uchrashuvlar 17 fevral, javob bahslari esa 24 fevral kunlari bo‘lib o‘tadi.

Keyin-chi?
Ushbu bosqich g‘oliblari nimchorak finalga yo‘l oladi va Yevropa ligasi guruh bosqichida 1-o‘rinni egallaganlar safiga qo‘shiladi. Mag‘lub bo‘lganlar musobaqani tark etishadi. 1/8 finalga qur’a tashlash marosimi 25 fevral kuni bo‘lib o‘tadi.