Farg‘onaning "Neftchi" jamoasi 2022 yilda Superligada o‘ynash huquqini muddatidan ilgari qo‘lga kiritganligini hamma yaxshi biladi. Jamoa bosh murabbiyi Ilhom Mo‘minjonov yangi mavsumga har jihatdan puxta tayyorgarlik bilan borish maqsadida tarkibni yosh, iqtidorli o‘yinchilar bilan mustahkamlash masalalariga jiddiy e’tibor bermoqda. Bugun yoshlar jamoasida to‘p surgan yarim himoyachi Azamatjon Tolibjonov bilan tuzilgan 3 yillik shartnoma bunga yaqqol dalildir. Bu futbolchi "Neftchi" U-18 tarkibida 21 marta maydonga tushib, raqiblar darvozasini 9 marta ishg‘ol qilishdan tashqari, tengdoshlariga golli uzatmalarni amalga oshirishda ham ibrat ko‘rsatdi. Shu bois, ming-minglab muxlislar va mutaxassislar nazariga tushdi.

Porloq kelajak sari ishonchli qadam tashlayotgan yosh mahorat egasi Superliga uchrashuvlarida yuksak ishonchni oqlab, jamoa oldiga qo‘yilgan vazifalarni muvaffaqiyatli bajarishiga munosib hissa qo‘shadi deya, unga omad va zafarlar tilab qolamiz.

"Neftchi" matbuot xizmati