Xabaringiz bor, so‘nggi yillarda futbol mutaxassislarini tayyorlash, qayta tayyorlash, malakasini oshirish, ilmiy-metodik va innovasion texnologiyalarni joriy etish orqali futbol sohasida yetuk va chuqur bilimga ega kadrlar tayyorlash bo‘yicha qator ishlar olib borilmoqda. Xalqaro talab va standartlar asosida futbol bo‘yicha mutaxassislarni tayyorlash maqsadida O‘FA qoshida Futbol mutaxassislarini tayyorlash markazi (FMTM) faoliyat ko‘rsatmoqda.

Bugun mazkur markazda marketing yo‘nalishi bo‘yicha professional futbol klublari mutaxassislari uchun o‘quv seminari o‘tkazildi.

Uni Mirzo Ulug‘bek nomidagi O‘zbekiston Milliy universiteti o‘qituvchisi Anatoliy Shirov olib bordi.

Seminarda futbol klublarini rivojlantirish uchun marketing yo‘nalishi bo‘yicha amalga oshirilayotgan ishlar, yuzaga kelayotgan muammolar, klublarning mavjud infratuzilmasidan foydalangan holda qo‘shimcha daromadlar olish usullari, muxlislarni jalb qilish kabi mavzularda o‘zaro fikr almashildi. Shuni ta’kidlab o‘tish joizki, seminar zamonaviy innovasion va interaktiv ko‘rinishda o‘tkazildi va bu ishtirokchilarning yanada faol bo‘lishiga turtki bo‘ldi.

Mazkur darsga O‘FA birinchi vise-prezidenti Ravshan Ermatov ham tashrif buyurdi.

Ravshan Ermatov marketingni futboldagi o‘rni muhimligini qayd etib, bu borada amalga oshirilishi zarur bo‘lgan ko‘plab vazifalar, sohadagi mutaxassislarning malakasini oshirish zarurligini ta’kidlab o‘tdi.

Seminar ishtirokchilari marketing yo‘nalishi bo‘yicha o‘zlarini qiziqtirgan savollarga ilmiy asoslangan javoblar olishdi.