«Real» bosh murabbiyi Karlo Anchelotti Ispaniya chempionatining 21-turi doirasida bo‘lib o‘tgan «Atletik Bilbao»ga qarshi o‘yin (2:1) borasida o‘z fikrini bildirib o‘tdi.

«Bu g‘alaba biz uchun katta ahamiyatga ega. Bir to‘p bilan g‘alaba qozonilgan o‘yinlarda so‘nggi soniyalargacha sabr qilishga to‘g‘ri keladi. Benzema? U ajoyib hujumchi, ajoyib sardor, buyuk o‘yinchi, buyuk inson, juda kuchli va kamtar.

Mazkur uch ochko tufayli ta’qibchilardan yanada ilgariladik va endi xotirjam dam olsak bo‘ladi.

So‘nggi paytlarda bu tarkib o‘ynamagan bo‘lsak-da, bugun maqsadga erishishga qaratilgan o‘yin namoyish etdik. Nacho, Azar, Fede [Valverde], Kamavinga – ularning barchasi ajoyib o‘yin o‘tkazishdi va yuqori jonbozlik ko‘rsatishdi.

Azar avvalgi saviyasiga qaytdi. U yaxshi o‘ynadi va maydonda jang qildi. Jamoa himoyalanayotganda Azar va Vinisius qanday harakat qilish kerakligini yaxshi tushunishadi», – dedi Anchelotti.