Polshaning Varshava shahrida blis shaxmat bo‘yicha jahon chempionati o‘z nihoyasiga yetdi. Bugun o‘tkazilgan bahslar yakuniga ko‘ra, Javohir Sindarov hamyurtlarimiz ichida eng yaxshi natijani qayd etdi.
Shaxmatchimiz 21 imkoniyatdan 13,5 ochko jamg‘argan holda 8-o‘rinni egalladi. Sindarov so‘nggi tur oldidan o‘tkazilgan Levon Aronyan (AQSH)ga qarshi oq donalarda o‘ynab, imkoniyatni boy berib qo‘ydi. Vatandoshimiz vaqt tanqisligiga uchragani sababli xatoga yo‘l qo‘ydi. Javohir mazkur bahsda g‘alaba qozonganida, yanada yuqoriroq o‘rinlardan birini egallashi mumkin edi. Mazkur natija uchun Sindarov 14 ming dollar mukofot pulini qo‘lga kiritdi.
Shuningdek, Shamsiddin Vohidov 12,5 ochko bilan 40, Nodirbek Abdusattorov esa 12 ochko bilan 43-o‘rinni band etdi. Jahongir Vohidov esa 11 ochko bilan 80-o‘rindan joy oldi.
Ma’lumot uchun, blis bahslarida 180 nafar shaxmatchi sovrinli o‘rinlar uchun kurash olib bordi. Chempionlik unvoni esa fransiyalik Maksim VashYE-Lagravga nasib etdi. U tay-breykda polshalik Yan-Kristof Dudani mag‘lub etdi.
Eslatib o‘tamiz, bir necha kun oldin Nodirbek Abdusattorov rapid shaxmat bo‘yicha jahon chempionligini qo‘lga kiritgandi.
