Польшанинг Варшава шаҳрида блиц шахмат бўйича жаҳон чемпионати ўз ниҳоясига етди. Бугун ўтказилган баҳслар якунига кўра, Жавоҳир Синдаров ҳамюртларимиз ичида энг яхши натижани қайд этди.
Шахматчимиз 21 имкониятдан 13,5 очко жамғарган ҳолда 8-ўринни эгаллади. Синдаров сўнгги тур олдидан ўтказилган Левон Аронян (АҚШ)га қарши оқ доналарда ўйнаб, имкониятни бой бериб қўйди. Ватандошимиз вақт танқислигига учрагани сабабли хатога йўл қўйди. Жавоҳир мазкур баҳсда ғалаба қозонганида, янада юқорироқ ўринлардан бирини эгаллаши мумкин эди. Мазкур натижа учун Синдаров 14 минг доллар мукофот пулини қўлга киритди.
Шунингдек, Шамсиддин Воҳидов 12,5 очко билан 40, Нодирбек Абдусатторов эса 12 очко билан 43-ўринни банд этди. Жаҳонгир Воҳидов эса 11 очко билан 80-ўриндан жой олди.
Маълумот учун, блиц баҳсларида 180 нафар шахматчи совринли ўринлар учун кураш олиб борди. Чемпионлик унвони эса франциялик Максим Вашье-Лагравга насиб этди. У тай-брейкда польшалик Ян-Кристоф Дудани мағлуб этди.
Эслатиб ўтамиз, бир неча кун олдин Нодирбек Абдусатторов рапид шахмат бўйича жаҳон чемпионлигини қўлга киритганди.
