Jamoa seleksiya ishlaridagi amalga oshirilgan transferlarni e’lon qilishni davom ettiradi.

Bu gal AGMK futbol jamoasi O‘rta Osiyo futboli yulduzlaridan biri sanalgan iste’dod sohibi, tojikistonlik Alisher Jalilov bilan kelishuvga erishdi.

Faoliyatini Qozonning “Rubin” klubida boshlagan Alisher Jalilov ma’lum vaqt “Nefteximik” va “Baltika” jamoalari ham o‘ynagan. 2019 yildan e’tiboran esa Tojikistonga qaytgan va ketma-ket 3 mavsum “Istiqlol” jamoasi bilan mamlakat chempioniga aylangan.

Alisher Jalilov futbolchilik faoliyatini Rossiyada boshlagan va Rossiyaning turli yoshdagi terma jamoalarida ham faoliyat ko‘rsatgan. Keyinchalik esa Jalilov Tojikiston milliy terma jamoasida o‘ynashni ma’qul topgan va futbolchi 2019 yildan e’tiboran Tojikiston milliy jamoasi a’zosi sanaladi.

Alisher Jalilov markaziy yarim himoyachi ampluasida o‘ynaydi. Futbolchi faoliyati davomida jami 159 o‘yin o‘tkazgan va raqiblar darvozasiga 40ta gol kiritgan.
Alisher Jalilov 1993 yili 29 avgust kuni tavallud topgan.