Ze Robertoni eslaysizmi? Braziliyalik futbolchi «Bavariya» va «Bayer»da yorqin o‘yinlar namoyish etgan, biroz muddat Madrid «Real»ida o‘ynagan - faoliyati ajoyib chiqdi. U futboldan ketganidan keyin ham tin olmadi - aytishicha, 47 yoshga to‘lganiga qaramay, tanasi 36 yoshli Krishtianu Ronaldunikidan yaxshiroq ekan.
«O‘ylashimcha, mening tanam - dunyodagi eng yaxshisi. U 43 yoshga to‘lgunimcha o‘ynash imkoniyatini berdi. Agar Ronaldu yuqori darajada shunday uzoq muddat o‘ynay olsa, Krishtianuni tengsiz deb tan olaman. Hozircha esa zo‘ri menman», - deydi Ze Roberto tabassum bilan.
Qahramonimiz - ajoyib atlet: u 43 yoshida ham «Palmeyras»da o‘ynagan, 40 yoshdan o‘tganidan so‘ng 100dan ortiq uchrashuvda maydonga tushgan. 2017 yilning noyabrida Roberto nihoyat, butsalarini mixga ilishga qaror qildi - ammo 47 yoshli braziliyalikning formasiga istalgan sportchi havas qilsa arziydi.
2020 yilda Roberto uzoq faoliyati siri bilan o‘rtoqlashdi: «Mening zararli odatlarim yo‘q. Alkogol ichmayman, chekmayman, to‘g‘ri ovqatlanaman, yaxshi uxlayman. Oilam meni himoya qiladi. Ularning qo‘llab-quvvatlashi bo‘lmaganida, bu qadar uzoq vaqt o‘ynolmasdim. Musobaqalashish kerak bo‘lgan inson - sizning o‘zingiz. Har doim motivasiyani saqlab qolish lozim. Odam o‘zini kuzatishda davom etsa, futbolda istagancha qolishi mumkin. Butun faoliyatim davomida o‘zim haqimda qayg‘urdim. Jismoniy holatimga alohida e’tibor qaratdim».
Roberto chindan ham mashg‘ulotlarga jiddiy qaraydi. 2019 yili u hattoki, Neymarga ham tavsiya bergandi - ishga yondashuvni o‘zgartirib, albatta, imkon qadar ko‘proq shug‘ullanish lozimligini aytdi. «Miyada nimanidir tuzatish maqsadga muvofiq. U fundamental ravishda o‘zgarishi kerak, - deydi Roberto. - Neymarning asosiy e’tibori futbolga qaratilmagan. Qaysidir pallada bu o‘yindan rohatlanmay qo‘yadi. Agar shu zayl davom etsa, u 30 yoshdayoq faoliyatini yakunlaydi. Hammamiz pulni yaxshi ko‘ramiz - ammo Ronaldu va Messining intilishiga bir qarang. Aynan shu jihat bilan ular Neymardan farqlanadi».
10 yildan so‘ng Ronaldu Ze Robertoga qanday javob qaytarar ekan? Buni vaqt o‘tgach bilib olamiz.
R.IBROHIMOV tayyorladi
