Qishki transfer oynasi vaqtida «Inter» «Leypsig»ning chap qanot himoyachisi Anxelinyoni o‘z safiga qo‘shib olishga harakat qildi. Biroq kelishuv amalga oshmadi, nemis klubi 25 yoshli ispaniyalik uchun 50 million yevro olmoqchi edi, deb xabar beradi AS.
Natijada, «neradzurrilar» «Atalanta» futbolchisi Robin Gosensni qo‘lga kiritdi. Italiya klubi nemis futbolchisi uchun 25 million yevro to‘lashdi. Ammo, «Inter» Anxelinyo uchun harakatda davom etadi va yozda uni sotib olishga yana urunib ko‘radi, chunki Ivan Perishich jamoani yozda tark etishi mumkin.
Anxelinyo uchun kurashda «Inter»ning raqobatchisi «Real Madrid» hisoblanadi. Ushbu futbolchi yozda shartnomasi yakunlanganidan so‘ng «Real»ni tark etadigan braziliyalik Marseloning o‘rniga o‘rinbosar bo‘lishi mumkin.
Anxelinyo 2021/22 yilgi mavsumda «Leypsig» safida barcha musobaqalarda 25 ta o‘yinda maydonga tushib, 7 ta golli uzatmani amalga oshirgan. Uning «buqalar» bilan shartnomasi 2025 yilning yoziga qadar mo‘ljallangan.
