Қишки трансфер ойнаси вақтида «Интер» «Лейпциг»нинг чап қанот ҳимоячиси Анхелиньони ўз сафига қўшиб олишга ҳаракат қилди. Бироқ келишув амалга ошмади, немис клуби 25 ёшли испаниялик учун 50 миллион евро олмоқчи эди, деб хабар беради АS.

Натижада, «нерадзуррилар» «Аталанта» футболчиси Робин Госенсни қўлга киритди. Италия клуби немис футболчиси учун 25 миллион евро тўлашди. Аммо, «Интер» Анхелиньо учун ҳаракатда давом этади ва ёзда уни сотиб олишга яна уруниб кўради, чунки Иван Перишич жамоани ёзда тарк этиши мумкин. 

Анхелиньо учун курашда «Интер»нинг рақобатчиси «Реал Мадрид» ҳисобланади. Ушбу футболчи ёзда шартномаси якунланганидан сўнг «Реал»ни тарк этадиган бразилиялик Марселонинг ўрнига ўринбосар бўлиши мумкин.

Анхелиньо 2021/22 йилги мавсумда «Лейпциг» сафида барча мусобақаларда 25 та ўйинда майдонга тушиб, 7 та голли узатмани амалга оширган. Унинг «буқалар» билан шартномаси 2025 йилнинг ёзига қадар мўлжалланган.