Bolgariyaning Sofiya shahrida o‘tkazilayotgan boks bo‘yicha "Stranja kubogi" musobaqasida bugun final janglari bo‘lib o‘tmoqda. Kunduzgi dasturda 3 nafar sportchimiz ringga ko‘tarilib, ularning barcha chempionlik nashidasini surishdi.

Hasanboy Do‘smatov (51 kg.), Abdumalik Halakov (57 kg.) va Mujibillo Tursunov (63,5 kg.) o‘z raqiblarini mag‘lub etishgandi.

Kechki dasturda esa og‘ir vazndagi ikki bokschimiz bolgariyalik sportchilarga qarshi jang olib borishdi. 86 kg. vazndagi Odiljon Aslonov mezbon sportchisi Kristian Nikolov ustidan 5:0 hisobida g‘alaba qozondi.

92 kg. vazndagi atletimiz Madiyar Saidrahimov esa Radoslav Pantaleevga qarshi jangda to‘liq ustunlikka erishdi. So‘nggi raundda hamyurtimiz ogohlantirish olganiga qaramay, jangni 5:0 hisobida o‘z foydasiga hal qildi.

Shu tariqa, O‘zbekiston delegasiyasi hisobidagi oltin medallar soni 5taga yetdi. Ertaga +92 kg vaznli bokschimiz Lazizbek Mullojonov oltin medal uchun jang o‘tkazadi.