OFK Ijroiy qo‘mitasining navbatdagi yig‘ilishida qit’a futboliga daxldor bir qator yangiliklar tasdiqlandi. Jumladan, OCHL formati o‘zgartirilishi rasman ma’lum qilindi.

* 2023 yildan e’tiboran OCHL va OFK kubogi turnirlari «kuz-bahor» formatida o‘tkaziladi. Demak, har ikki musobaqa kuzda startga chiqadi va keyingi yilning bahorida finishga yetadi.

* Aynan mavsum 2023/2024dan e’tiboran OCHL va OFK kubogida legionerlarga nisbatan belgilangan limit «5+1»ga oshiriladi. Oddiy aytganda, ishtirokchi jamoalar yangi qoidaga muvofiq, 6 nafar (ulardan biri OFK tarkibidagi mamlakatdan bo‘lishi shart) xorijlikni turnir «zayavka»siga kiritishi mumkin. Eslatma, hozir har ikki turnirda «3+1» limiti amalda.

* Mavsum 2023/2024dan e’tiboran OFK klublar turnirlarida «3ta sariq kartochkaga diskvalifikasiya» qoidasiga amal qilinadi. Ma’lumot uchun, hozirgi qoidaga ko‘ra, 2ta «sariq» olgan futbolchilar keyingi o‘yinni o‘tkazib yuborishga majbur bo‘lishadi.

* 2023 va 2024 yil taqvimiga kiritilgan U-17, U-20 va U-23 toifasidagi Osiyo chempionatlari saralash bosqichida jamoalar «Sharq» va «G‘arb» mintaqasiga ajratilmaydi. Demak, «Sharq» va «G‘arb» mintaqalari vakillari 1ta guruhga tushishlari mumkin.