«Manchester Yunayted» Angliya Premyer-ligasining 29-turi doirasida o‘z maydonida Londonning «Tottenxem» klubini qabul qildi va bu uchrashuvda Krishtianu Ronaldu uchta gol urib, klubiga g‘alaba keltirdi. Ronaldu uchun bu uning Angliya Premyer-ligasidagi ikkinchi xet-trigi bo‘ldi. U birinchi marta 2008 yilning yanvarida «Nyukasl»ga qarshi kechgan o‘yinda, «Manchester Yunayted» safida ilk marta bir o‘yinda 3 ta gol urgan. Ronalduning ikkita xet-triki o‘rtasida o‘n to‘rt yil-u ellik to‘qqiz kun bor va bu Angliya Premyer-ligasi tarixidagi ikkita xet-trik o‘rtasidagi eng uzun davr hisoblanadi.
Bu mavsumda Krishtianu Ronaldu chempionatda 12 ta gol urdi, u hozirda jamoasining eng yaxshi to‘purari hisoblanadi.
