Superliganing dastlabki ikki turida «Dinamo» jamoasi o‘tgan yilgi chempion «Paxtakor» va vise-chempion «So‘g‘diyona»ga qarshi maydonga tushdi. Navbatdagi bahsda esa jamoamiz turnir peshqadami bo‘lib turgan «Qizilqum»ga qarshi maydonga tushadi. O‘tgan ikki bahs va 3-tur o‘yini oldidan «Dinamo» bosh murabbiyi Predrag Rogan klub matbuot xizmati orqali muxlislarga fikrlarini yetkazdi.

«Chempionatning dastlabki ikki turida bizni qanday qiyin o‘yinlar kutib turganini yaxshi bilardik, chunki raqiblar – chempion va vise-chempion edi.

Bu o‘yinlar bizni ko‘proq ruhlantirdi va shuni aytishni istardimki, raqibimiz kim bo‘lishidan qat’i nazar, har bir o‘yinga to‘liq kuch bilan tayyorgarlik ko‘ramiz. Albatta, o‘tgan ikki o‘yinda biz yaxshiroq natijani kutgan edik, ammo vaziyatga real yondashish lozim. O‘yinlarda yaxshi vaziyatlarimiz ko‘p bo‘ldi, ammo ulardan foydalana olmadik. Futbolda esa buning uchun raqib seni jazolashi aniq. «Paxtakor» va «So‘g‘diyona»dek tajribali jamoalar esa o‘z vaziyatlaridan foydalanmay qo‘yishmaydi. Biz to‘liq yangi jamoamiz, hali vaqt kerak, sabr bilan ko‘p ishlashimiz lozim. O‘tgan ikki turda kuchli jamoalarga qarshi o‘yinda, istalgan raqib bilan tengma-teng o‘ynay olishimizni ko‘rsatdik. Tarkibimizdagi juda ko‘p futbolchilar «Dinamo» libosini kiyishga munosib ekanliklarini ko‘rsatishdi. Ularning aksariyati yosh, hali Superliga o‘yinlarida o‘ynash tajribasi kerak. Muhimi, futbolchilar o‘z ustida ishlab, «Dinamo» uchun bor kuchlarini sarflab, vijdonan ishlashmoqda, tajriba esa o‘yindan-o‘yinga oshaveradi. Aksariyat o‘yinchilarga esa maydonda ko‘proq imkoniyat berib, ular ham jamoani kuchaytirish uchun taklif etilganini isbotlash lozim.

«Dinamo» muxlislariga o‘tgan ikki turdagi qo‘llab-quvvatlash uchun minnatdorchilik bildiraman. Ularning har biri – bir bo‘lagimiz. Chunki «Dinamo»dek jamoaning muxlislari bilan hammasi osonroq kechadi. Qo‘llab-quvvatlash uchun rahmat, balli yigitlar! «Dinamo» uchun birga, olg‘a!», - dedi Predrag Rogan «Dinamo» klubi rasmiy saytiga.

Ma’lumot uchun, «Dinamo» Superliga 3-turida 17 mart, payshanba kuni Superliga peshqadami bo‘lib turgan «Qizilqum»ga qarshi saf tortadi.