APL 28-turidan turidan o‘rin olgan «Norvich» - «Brentford» uchrashuvida kutilmagan voqea sodir bo‘ldi. Mehmonlar mazkur bahsda 3:1 hisobida g‘alaba qozonishdi, lekin quyidagi ma’lumot mavzusi mutlaqo boshqa.

O‘yinning 39-daqiqasida mezbonlar himoyachisi Brendon Uilyams raqib futbolchisi unga nisbatan qo‘pollik ishlatib, yerga qulatganidan g‘azablandi va darhol javob qaytarishga urindi, biroq... ro‘parasida Kristian Eriksenni ko‘rgan yosh futbolchining yuz ifodasi o‘zgardi, tabassum bilan raqibini quchoqlab oldi. Mazkur holat aks etgan videorolik zumda internet tarmoqlarida tarqalib, ko‘pchilikning yuksak e’tirofiga sazovor bo‘ldi.

Xabaringiz bor, Yevro-2020da daniyalik yarim himoyachining maydonda yuragi to‘xtab qolgan, faqatgina shifokorlar yordamida uning hayoti saqlab qolingandi.

Yanvarda «Tottenxem» va «Inter»ning sobiq futbolchisi «asalarilar» bilan yarim yillik shartnoma imzoladi. Dastlab «Brentford»ning U-23 jamoasida bir nechta o‘yin o‘tkazgan Eriksen 26 fevral kuni «Nyukasl»ga qarshi bahsda zaxiradan maydonga tushdi. «Norvich» bilan uchrashuvda u uzoq muddatdan keyin ilk bor boshlang‘ich tarkibga kiritilgandi.

E’tiborlisi, asta-sekin yana katta futbol havosidan bahra olayotgan 30 yoshli yarim himoyachi shu bilan cheklanib qolmoqchi emas. Eriksen joriy yil Qatarda o‘tkaziladigan jahon chempionatida ham qatnashish niyatida. Ma’lumot uchun, Daniya milliy termasi mundial saralashida muvaffaqiyatli qatnashib, final bosqich masalasini birinchilardan bo‘lib hal qilgandi.

R.IBROHIMOV tayyorladi