Ma’lum qilganimizdek, bahor faslining ilk kunlarida o‘z yutuqlari bilan muxlislarimizga quvonch ulashgan boks bo‘yicha o‘smirlar va yoshlar terma jamoalarimiz, shuningdek, taekvondo bo‘yicha kattalar jamoamiz bugun tong saharda Toshkentga qaytib kelishdi.

Qahramonlarimiz Islom Karimov nomidagi Toshkent xalqaro aeroportida munosib kutib olindi. Tadbirda Shahrullo Mahmudov boshchiligidagi Sportni rivojlantirish vazirligi mutasaddilari, Milliy Olimpiya qo‘mitasi, Sport yakkakurashlari bo‘yicha Respublika Oliy sport mahorati maktabi, O‘zbekiston boks federasiyasi va taekvondo assosiasiyasi xodimlari, O‘zbekiston Respublikasi Mudofaa vazirligi xizmatchilari hamda harbiy orkestr, sportchilarimizning yaqinlari, OAV vakillari ishtirok etishdi.

Katta tarkibdagi jamoalarimizning har biri alohida tantana bilan qarshi olindi. Tadbirda mutasaddilar sportchilarimizni qutlashar ekan, ular qayd etgan natija yosh avlodning sportga bo‘lgan qiziqishini yanada orttirishga, mamlakatimizda sog‘lom turmush tarzi va ommaviy sport targ‘ibotining oshishida ulkan hissa qo‘shishini ta’kidlashdi.

Eslatib o‘tamiz, yosh bokschilarimiz 1-14 mart kunlari Iordaniyada o‘tgan o‘smirlar va yoshlar o‘rtasidagi Osiyo chempionatida munosib ishtirok etishdi. Unda ringga ko‘tarilgan 49 nafar bokschimizning 43 nafari shohsupaga ko‘tarildi. Shubhasiz, bunday natija bilan ular umumjamoa hisobida birinchi o‘rinni egalladilar. Qolaversa, taekvondochilarimiz 4-14 mart kunlari Eronda o‘tgan 3 ta xalqaro musobaqada 7 ta oltin, 6 ta kumush va 11 ta bronza, jami 24 ta medalga sazovor bo‘lishdi.