Erling Xoland katta ehtimol bilan yozda «Borussiya D»ni tark etadi.

Bild xabariga ko‘ra, norvegiyalik hujumchining transferi uchun, taxminan, 355 million yevro sarflash kerak bo‘ladi. Bu summaga maosh, tovon puli va futbolchining atrofidagilar uchun to‘lanadigan komissiya kiradi. Hozirda hujumchi uchun kurashda eng qulay pozisiyani «Manchester Siti» egallab turibdi.

«Borussiya D» Xolandning shartnomasida ko‘rsatilgan 75 million yevrodan bor-yo‘g‘i 50—55 million yevro oladi, chunki futbolchining agenti Mino Rayola bu summaning 10 million yevrosiga ega chiqadi.

Bundan tashqari, Dortmund klubi norvegiyalik futbolchi avval o‘ynagan barcha klublarga bonuslar to‘lashi kerak bo‘ladi.

Goal’ning yozishicha, Xoland hali qaysi klubga o‘tishni hal qilmagan va Karim Benzema hamda Kilian Mbappe bilan «Real»da birga to‘p surish to‘g‘ri qaror ekanligiga shubha qilmoqda. U loyihaning asosiy yulduzi bo‘lishni xohlaydi.

Qayd etilishicha, «Real» ham hali Xolandga taklif bilan chiqmagan. Shuningdek, «Barselona» ham futbolchi atrofidagi vaziyatni kuzatib borayotgani aytilmoqda.

21 yoshli hujumchi joriy mavsumda «Borussiya D» safida 22 ta o‘yinda maydonga tushib, 23 ta gol urdi va 5 ta golli uzatmani amalga oshirdi. Uning «arilar» bilan shartnomasi 2024 yilda o‘z nihoyasiga yetadi.