«Atalanta» Italiya chempionatining joriy mavsumida u qadar muvaffaqiyatli ishtirok eta olmayapti. Jamoani jarohatlar qiynab qo‘ydi. Jamoaning asosiy hujumchisi Duvan Sapata 6 fevraldan buyon maydonga tushmayotgan bo‘lsa, ikkinchi hujumchi Luis Muriel 2022 yilda 2ta gol muallifiga aylandi xolos. Uni qandaydir ruhiy muammolar qiynamoqda. Gasperini 20 mart kuni "Bolonya"ga qarshi o‘yinda Miranchuk, Malinovskiy va Jeremi Boganing xizmatlaridan foydalana olmadi.

Shu bois, murabbiy yetakchilarning o‘rnini to‘ldirish maqsadida yosh futbolchilar xizmatidan foydalanishga majbur bo‘ldi. Ular orasida esa 18 yoshli Mustafo Sisse o‘zini ko‘rsatishga muvaffaq bo‘ldi. Gvineyalik futbolchi bir tur avval bo‘lib o‘tgan "Jenoa"ga qarshi o‘yin uchun qaydnomaga kiritilgan bo‘lsa, 20 mart kuni A seriyada debyut qildi. U bahsning 65-daqiqasida maydonga tushgan bo‘lsa, oradan 17 daqiqa o‘tib jamoasining g‘alaba to‘piga mualliflik qildi!

Mustafoning so‘nggi oydagi faoliyati ertakka o‘xshaydi. Atigi 1 oy avval qochoqlar tuzilgan jamoa safida o‘ynab yurgandi. Qisqa vaqt ichida A seriyaning yetakchi klubida gol muallifiga aylanmoqda! Sisse 27 fevral "Atalanta"ning yoshlar jamoasida debyut qilgandi. U yoshlar jamoasi safida 3ta o‘yinda 3 gol muallifiga aylandi va asosiy jamoaga o‘tkazildi.

Bungacha u Italiyaning sakkizinchi divizionida ishtirok etayotgan «Rinascita Refugees» havaskor jamoasida o‘ynayotgan edi. Uni "Atalanta" skautlari payqab qolib, klubga taklif qilishdi.

Mustafo 2003 yilda Gvineyaning Kankari shahrida tug‘ilgan. U 16 yoshida otasidan ayrilgach, o‘z baxtini topish uchun Italiyaga yo‘l oldi. Lechche yaqinida Salento shahrida migrantlarga yordam beruvchi «Rete!» dasturi unga qo‘l keldi. Sisse tashkilot homiyligi ostidagi «Rinascita Refugees» klubiga joylashtirildi.

Mustafo o‘z gollari orqali jamoasining 7-divizionga ko‘tarilishiga yordam berdi. Yuqorida aytganimizdek, 18 futbolchi "Atalanta" seleksionerlari e’tiboriga tushgach, 23 fevral kuni «Atalanta» bilan shartnoma imzoladi va oradan 4 kun o‘tib yoshlar jamoasida debyut qildi. Bu bahsda u «Milan» yoshlari darvozasiga 2ta gol urdi. 9 mart esa esa Sisse «Napoli»ga qarshi o‘yinda bitta gol muallifiga aylandi.

Mustafoning iqtidori Bergamo shahri jamoasini o‘ziga shunchalik mahliyo etdiki, uning uchun boshqa legionerni ro‘yxatdan chiqarib, Sisseni registrasiyadan o‘tkazishdi. O‘yin uslubi bo‘yicha Sisse jamoaning asosiy hujumchisi Duvan Sapataga o‘xshab ketadi. Hozircha esa unga yakkakurashlarda muvaffiyatli ishtirok etish uchun mushaklaridagi kuch yetishmayapti. Ammo u joy tanlashni biladi, yaxshi zarbaga ega va texnikasi ham yomon emas.

Bu nomni eslab qolamiz va Mustafoga omad tilaymiz.