«Real» va Fransiya terma jamoasi hujumchisi Kilian Mbappe faoliyatida ilk bor «Oltin to‘p»ni qo‘lga kiritish uchun asosiy favorit bo‘lib turibdi. Bu haqda L’Équipe nashri xabar berdi.
Fransuz nashrining ta’kidlashicha, Ispaniyaning 2026 yilgi jahon chempionatidagi g‘alabasi «Qizil furiya»ning bir nechta futbolchisini asosiy da’vogarlar qatoriga olib chiqdi. Biroq ispaniyalik nomzodlar ko‘pligi ovozlarni bo‘lib yuborishi mumkin va bu holat Mbappening foydasiga ishlashi ehtimoldan xoli emas.
Nashr fikricha, fransiyalik hujumchining asosiy ustunligi uning yuqori samaradorligi hisoblanadi. Garchi o‘tgan mavsumda u jamoaviy sovrinlarni qo‘lga kirita olmagan bo‘lsa-da, Ispaniya chempionatida 25 ta gol bilan, Chempionlar ligasida esa 15 ta gol bilan eng yaxshi to‘purar bo‘ldi. Jahon chempionatida ham 10 ta gol urib, turnirning eng yaxshi to‘purariga aylandi.
Shuningdek, Mbappe jahon chempionatlaridagi gollari sonini 22 taga yetkazib, mundial tarixidagi eng yaxshi to‘purarga aylandi. 2026 yilda u Olivye Jiruning rekordini ham yangilab, Fransiya terma jamoasi tarixidagi eng yaxshi to‘purarga aylandi. Uning milliy jamoa safidagi gollari soni 66 taga yetdi.
L’Équipe talqiniga ko‘ra, Mbappening asosiy raqobatchilari — jahon chempionlari Rodri, Lamin Yamal va Fabian Ruis. Rodri JCH-2026ning eng yaxshi futbolchisi deb topildi, Lamin Yamal jahon chempionligi va La Liga g‘olibligini qo‘lga kiritdi, Fabian Ruis esa Ispaniya bilan jahon chempionligini va «Pari Sen-Jermen» bilan Chempionlar ligasini yutib, «dubl» qayd etdi.
Nashr shuningdek, ispaniyalik nomzodlar ko‘pligi ularning har biriga yetarlicha ovoz to‘plashga to‘sqinlik qilishi mumkinligini ta’kidlagan. Xuddi shunday vaziyat «PSJ» futbolchilari — Fabian Ruis, Usmon Dembele va Xvicha Kvarasxeliya o‘rtasida ham kuzatilishi mumkin.
L’Équipe o‘tkazgan va 35 mingdan ortiq kishi ishtirok etgan so‘rovnoma natijalariga ko‘ra:
-
Kilian Mbappe — 32%
-
Rodri — 16%
-
Fabian Ruis — 12,7%
-
Xvicha Kvarasxeliya — 9,8%
-
Usmon Dembele — 7,9%
-
Lamin Yamal — 7%
-
Lionel Messi — 3,25%
Nashrning qayd etishicha, Argentina bilan jahon chempionati finaligacha yetib borgan 39 yoshli Lionel Messining «Inter Mayami»da to‘p surayotgani uning to‘qqizinchi «Oltin to‘p» uchun kurashdagi imkoniyatlariga salbiy ta’sir ko‘rsatishi mumkin.
Eslatib o‘tamiz, «Oltin to‘p»-2026 uchun 30 nafar nomzoddan iborat ro‘yxat sentyabr oyi boshida e’lon qilinishi rejalashtirilgan. Taqdirlash marosimi esa 26 oktyabr kuni Londonda bo‘lib o‘tadi.
