Parijning boy klubi - «PSJ» Yevropa Chempionlar Ligasida yana omadsizlikka uchradi va yana yangi murabbiy qidirish harakatini kuchaytirdi. Oddiy aytganda, argentinalik Maurisio Pochettino ham yaqin orada iste’foga chiqariladi, shekilli. Eh, yulduzli tarkib va behisob mablag‘ga ega Fransiya jamoasi bu ketishda qachon o‘ziga mos murabbiy toparkin....?

«PSJ» oxirgi yillarda qanday murabbiylarni qo‘ldan chiqarganini o‘ylasangiz, qo‘rqib ketasiz. Diqqat qiling, Parij jamoasi rahbariyati tomonidan javob berilgan yoki iste’foga chiqarilgan oxirgi 4 nafar bosh murabbiydan 3 nafari yangi ish joyida muvaffaqiyatga burkandi. Bu orada birgina Loran Blan futbolda yutuq ko‘rmadi, u Parijdan ketgach, hech qayerda ishlagani ham yo‘q. Agar fransiyalik mutaxassis qaysidir jamoa boshqaruvini qo‘lga olganida, ehtimol, u ham Karlo Anchelotti, Unai Emeri va Tomas Tuxel kabi o‘z kolleksiyasiga yevrokubok qo‘shib qo‘yarmidi? Chunonchi, ulardan har biri Parij klubi bilan xayrlashgach, yevroarenada zafar quchdi, boz ustiga, har uch mutaxassisning amaldagi jamoasi hozir CHL chorak finalida. «PSJ»ning sovrinlar vitrinasida esa hamon yevrokubok yo‘q...

«PSJ» bilan qandaydir sovrin yutgan bosh murabbiylar

Jorj Peyrosh (1979—1983) - Fransiya kubogi

Jerar Ulye (1985—1987) - Birinchi divizion oltin medali

Artur Jorje (1991—1994, 1998—1999) - Birinchi divizion oltin medali, Fransiya kubogi

Luis Fernandes (1994—1996, 2000—2003) - Fransiya kubogi, Liga kubogi, Fransiya superkubogi, UYEFA kubogi, Intertoto kubogi

Loran Blan (2013—2016) - Liga 1 oltin medali (3), Fransiya kubogi (2), Liga kubogi (3), Fransiya superkubogi (3)

Unai Emeri (2016—2018) - Liga 1 oltin medali, Fransiya kubogi (2), Liga kubogi (2), Fransiya superkubogi (2)

Tomas Tuxel (2018—2020) - Liga 1 oltin medali (2), Fransiya kubogi, Liga kubogi, Fransiya superkubogi (2)

Maurisio Pochettino (2021—...) - Fransiya kubogi, Fransiya superkubogi