"PSJ" hujumchisi Kilian Mbappe yana voqealar markaziga tushdi. Bu safar 23 yoshli futbolchi ayrim masalalarda Fransiya futbol federasiyasi (FFF) bilan kelisha olmayapti.

"L’Équipe" tarqatgan xabarga ko‘ra, Mbappe Federasiyasi tomonidan o‘tkazilgan ba’zi tadbirlarda ishtirok etishdan bosh tortdi. Futbolchining agenti, advokati va ota-onasi FFF bilan muzokara olib borishdi, ammo bir to‘xtamga kela olishmadi. Kilian Federasiyaning homiysi bo‘lgan kompaniyalar bilan hamkorlik qilishni istamayapti. Terma jamoaning ba’zi homiylari futbolchiga yoqmaydi.

Mbappe faqat o‘zi istagan kompaniyaliklar hamkorlik qilishni afzal bilmoqda. Ammo Federasiyaning o‘z manfaatlari mavjud. Ushbu masalani hal etish uchun FFF prezidentining shaxsan o‘zi Kilian bilan gaplashdi, ammo, shunga qaramay, futbolchi Federasiyaning ba’zi tadbirlarida ishtirok etishni xohlamadi.

Mbappe 2010 yilda Futbol federasiyasi bilan tuzilgan o‘yinchining qiyofa bilan bog‘liq huquqlar borasida shartnomaga o‘zgartirish kiritilishini istamoqda. Hozir futbolchining imij huquqlari bilan bog‘liq daromadlar teng ikkiga bo‘linmoqda.

Kilian ayni paytda «Real» bilan ham imij huquqlari borasida muzokara olib bormoqda. Odatda "Qirollik klubi" o‘yinchilari bu huquqning 50 foizini klubga berishadi. Ammo 23 yoshli futbolchi, avvalroq Krishtianu Ronaldu bilan bo‘lgani kabi, barcha huquqlarni o‘zida saqlab qolmoqchi.

Mbappe bilan bog‘liq vaziyat Fransiya terma jamoasini xavotirga solmoqda. Chunki tomonlar kelishuvga erishmasa, buning oqibati terma jamoa o‘yinlariga ta’sir ko‘rsatishi mumkin.