Italiya jahon chempionatlariga bormaslikni o‘ziga odat qilib olyapti (2018, 2022). Yozilishicha, "Skuadra Adzurra" so‘nggi bor mundialda o‘ynaganidan keyin 3000 kunga yaqin vaqt o‘tibti. Bu raqam ortib borishi aniq. Endi 2026 yildagi yangi formatda o‘tadigan JCHga chiqishga urinib ko‘radi italiyaliklar. Qiziq, asrimizda sayyora va qit’a chempionatida tengsiz bo‘lgan terma jamoa yana mundialga bormaydi. Agar 2026 yilda jamoa nihoyat yo‘llanmani qo‘lga kiritsa, maydonda o‘sha 2006 yildagi chempionlikdan so‘ng tug‘ilgan futbolchilar to‘p tepadi ko‘p ehtimol.

Ikki nuqta.

— Mundial doim ayrim katta jamoalarsiz o‘tgan. Bu saralashning o‘ziga xos jihati, balki o‘ziga o‘rgatib ulgurgan intrigali jihati.

Boshqa jihatdan Italiya terma jamoasi doim futbol olamida nostalji manbai bo‘lib kelgan. Katta yoshli muxlislarning Badjo, Maldini yoki Del Pyero kabi futbolchilar borasidagi entikishiga guvoh bo‘lgandirsiz. Italiyasiz mundial aynan mana shu nostaljisiz mundial degani, menimcha. To‘g‘ri, bu hisni Braziliya, Fransiya yoki Germaniya terma jamoalari kompensasiya qilib berishi mumkin. Ammo, Italiya futbolining o‘z o‘rni borligi aniq.

Yana Italiyasiz turnir, masalan menga ayni avloddan Nikola Barella va Federiko Kyezani ko‘rolmasligim bilan ta’sirli.

— Ikkinchi nuqta. Hozir Manchini haqida tanqid yog‘dirishni ayni vaqti. Qarshi gap aytish qiyin. Argumentlar zaif bo‘lib qolgan vaqt. Axir Italiyadek mamlakatni JCHga olib chiqolmadi. Hammasi guruh bosqichidagi o‘yinlar bois yuz berdi. 9-turda Shveysariya bilan durangdan so‘ng jamoa Shimoliy Irlandiyaring yengsa ham ehtimol allaqachon Qatar yo‘llanmasini qo‘lga kiritib bo‘lardi. Biroq, nomida "Shimol" so‘zi ishtirok etgan mamlakatlar Italiyaga pand berishni o‘shandayoq boshlagandi - 0:0. Lekin, shaxsan menga Roberto Manchini tanlagan, shakllantirgan hujumkor uslub juda yoqadi. U iste’foga ketadimi yoki yo‘q, men uchun top darajadagi mutaxassislar qatorida qolaveradi.

Umid qilamanki, bu Qatar mundiali uchun so‘nggi yirik yo‘qotish bo‘ladi. Kuzatamiz!

Orif Tolipov.