Ramazon va aprel oyi futbol muxlislarini siylashda davom etadi. Kecha Sport-TV orqali Chempionlar ligasining ikki ajoyib uchrashuvini tomosha qildik. Bugun O‘zbekiston kubogidagi ikki teng kuchli raqiblar ishtirokidagi o‘yin Sport-TV orqali, "Paxtakor"ning Chempionlar ligasidagi o‘yini Futbol-TV orqali ko‘rsatiladi. O‘yinlar vaqti bir-biriga xalal bermaydi.

"Zomin" va "Xorazm" Pro ligada to‘qnash kelib ulgurmadi. E’tibor qilayotgan bo‘lsangiz, Pro ligada yaqqol ajralib qolayotgan jamoaning o‘zi yo‘q. 10 ta klubning eng kuchsizroq ko‘rinayotgani ham "Turon"ni qiynayapti, "Andijon"dan ochko tortib olyapti va hokazo.

15:45. ZOMIN — XORAZM. Sport-TV

AGMK esa Coca-cola Superliga 2-turida "Lokomotiv"dan alamli mag‘lubiyat qabul qilib olgandi. Ustunlik olmaliqliklar tarafida bo‘lsa ham, harakatlari Kloppni eslatib yuborayotgan "Loko" ustozi vaziyatdan chiqib keta olgan va yakunda 2 ta gol urib, iroda ko‘rsatgandi. Oradan 30 kun o‘tib Qosimov jamoasi revansh oladimi yoki temiryo‘lchilar bu safar ham yaxshiroq rejaga egamikin, bugun bilib olamiz.

18:00. AGMK — LOKOMOTIV. Sport-TV

"Paxtakor" esa Eronning "Sepahon"i bilan o‘ynaydi. Fors klublari Toshkent "sherlar"idan hayiqib turadi. Chunki "Paxtakor" Eron klublari bilan 23 marta to‘qnash kelib, 14 tasida g‘olib chiqqan. 4 ta durang va faqatgina 5 ta o‘yin forslar foydasiga hal bo‘lgan. "Paxtakor"ni Eronda yaxshi tanishadi, "Persepolis"u "Istiqlol"lar ham unga qarshi yetarlicha maydonga tushgan.

"Sepahon" o‘zbekistonlik futbolchilar to‘p surayotgan "Persepolis" va "Istiqlol"dan keyin fors ligasida uchinchi bo‘lib turibdi. O‘tgan mavsum jamoa kumush medallarga ega chiqib, Chempionlar ligasiga yo‘l oldi. "Paxtakor" esa chempion sifatida o‘ynaydi. Bizningcha, bu dahshatli o‘yin bo‘ladi. Uni albatta ko‘rish kerak.  

22:15. PAXTAKOR — SEPAXON. Futbol-TV