Рамазон ва апрель ойи футбол мухлисларини сийлашда давом этади. Кеча Спорт-ТВ орқали Чемпионлар лигасининг икки ажойиб учрашувини томоша қилдик. Бугун Ўзбекистон кубогидаги икки тенг кучли рақиблар иштирокидаги ўйин Спорт-ТВ орқали, "Пахтакор"нинг Чемпионлар лигасидаги ўйини Футбол-ТВ орқали кўрсатилади. Ўйинлар вақти бир-бирига халал бермайди.

"Зомин" ва "Хоразм" Про лигада тўқнаш келиб улгурмади. Эътибор қилаётган бўлсангиз, Про лигада яққол ажралиб қолаётган жамоанинг ўзи йўқ. 10 та клубнинг энг кучсизроқ кўринаётгани ҳам "Турон"ни қийнаяпти, "Андижон"дан очко тортиб оляпти ва ҳоказо.

15:45. ЗОМИН — ХОРАЗМ. Спорт-ТВ

АГМК эса Coca-cola Суперлига 2-турида "Локомотив"дан аламли мағлубият қабул қилиб олганди. Устунлик олмалиқликлар тарафида бўлса ҳам, ҳаракатлари Клоппни эслатиб юбораётган "Локо" устози вазиятдан чиқиб кета олган ва якунда 2 та гол уриб, ирода кўрсатганди. Орадан 30 кун ўтиб Қосимов жамоаси реванш оладими ёки темирйўлчилар бу сафар ҳам яхшироқ режага эгамикин, бугун билиб оламиз.

18:00. АГМК — ЛОКОМОТИВ. Спорт-ТВ

"Пахтакор" эса Эроннинг "Сепаҳон"и билан ўйнайди. Форс клублари Тошкент "шерлар"идан ҳайиқиб туради. Чунки "Пахтакор" Эрон клублари билан 23 марта тўқнаш келиб, 14 тасида ғолиб чиққан. 4 та дуранг ва фақатгина 5 та ўйин форслар фойдасига ҳал бўлган. "Пахтакор"ни Эронда яхши танишади, "Персеполис"у "Истиқлол"лар ҳам унга қарши етарлича майдонга тушган.

"Сепаҳон" ўзбекистонлик футболчилар тўп сураётган "Персеполис" ва "Истиқлол"дан кейин форс лигасида учинчи бўлиб турибди. Ўтган мавсум жамоа кумуш медалларга эга чиқиб, Чемпионлар лигасига йўл олди. "Пахтакор" эса чемпион сифатида ўйнайди. Бизнингча, бу даҳшатли ўйин бўлади. Уни албатта кўриш керак.  

22:15. ПАХТАКОР — СЕПАХОН. Футбол-ТВ