Ma’lumki, 9 aprel kuni «Andijon-SGS» jamoamiz joriy mavsumda o‘z maydonidagi ilk rasmiy uchrashuvini O‘zbekiston Kubogi doirasidan o‘rin olgan «Olimpik»ka qarshi o‘tkazadi.

Bo‘lajak uchrashuvga jamoamiz har tomonlama puxta tayyorgarlik ko‘rishga xarakat qilmoqda. Futbolchilardagi ishtiyoqni oshirish, ulardagi ruhiyatni yanada ko‘tarish maqsadida kuni-kecha Andijon viloyati hokimi Shuhratbek Abdurahmonov jamoamiz bilan uchrashdi.

Jamoamiz bosh homiysi «Shirin Gaz Servis» korxona raisi Muqaddas Rahimova boshchiligidagi «Andijon-SGS» futbol klubimizni viloyatimiz hokimi juda iliq qarshi oldi. Uchrashuvda Shuhratbek Abdurahmonov «Andijon-SGS» jamoasini har biri o‘yini natijasidan xabardor bo‘lib borayotganini, ayniqsa O‘zbekiston Kubogi saralash bahslarida uchta bahsda uchta g‘alaba qilingani kishini xursand qilib yuborganini alohida ta’kidlab o‘tdi.

Viloyatimiz hokimi futbolchilar bilan suhbatlashish chog‘ida ulardan kelajakda umidi katta ekanligini, sharoitlar borasida muammo bo‘lmasligini aytib o‘tdi. Shuhratbek Abdurahmonovning «Andijon-SGS»ga qaratayotgan bunday e’tibori, o‘z navbatida rasmiy uchrashuvlar oldidan jamoamizning har bir a’zosiga qo‘shimcha kuch bag‘ishladi.

Umid qilamizki, futbolchilarimiz o‘zlariga bildirilgan ishonchni to‘liq oqlash uchun bor kuch-g‘ayratini ishga soladi.