Маълумки, 9 апрель куни «Андижон-SGS» жамоамиз жорий мавсумда ўз майдонидаги илк расмий учрашувини Ўзбекистон Кубоги доирасидан ўрин олган «Олимпик»ка қарши ўтказади.

Бўлажак учрашувга жамоамиз ҳар томонлама пухта тайёргарлик кўришга харакат қилмоқда. Футболчилардаги иштиёқни ошириш, улардаги руҳиятни янада кўтариш мақсадида куни-кеча Андижон вилояти ҳокими Шуҳратбек Абдураҳмонов жамоамиз билан учрашди.

Жамоамиз бош ҳомийси «Ширин Газ Сервис» корхона раиси Муқаддас Раҳимова бошчилигидаги «Андижон-SGS» футбол клубимизни вилоятимиз ҳокими жуда илиқ қарши олди. Учрашувда Шуҳратбек Абдураҳмонов «Андижон-SGS» жамоасини ҳар бири ўйини натижасидан хабардор бўлиб бораётганини, айниқса Ўзбекистон Кубоги саралаш баҳсларида учта баҳсда учта ғалаба қилингани кишини хурсанд қилиб юборганини алоҳида таъкидлаб ўтди.

Вилоятимиз ҳокими футболчилар билан суҳбатлашиш чоғида улардан келажакда умиди катта эканлигини, шароитлар борасида муаммо бўлмаслигини айтиб ўтди. Шуҳратбек Абдураҳмоновнинг «Андижон-SGS»га қаратаётган бундай эътибори, ўз навбатида расмий учрашувлар олдидан жамоамизнинг ҳар бир аъзосига қўшимча куч бағишлади.

Умид қиламизки, футболчиларимиз ўзларига билдирилган ишончни тўлиқ оқлаш учун бор куч-ғайратини ишга солади.