O‘zbekiston kubogi musobaqasining guruh bosqichi 3-turidan o‘rin olgan "Qo‘qon-1912" - "Mash’al" (4:0) uchrashuvidan so‘ng mezbonlar bosh murabbiyi Baxtiyor Ashurmatov o‘z fikrlarini bildirib o‘tdi.
- Aytib o‘tgandim, guruhdagi birinchi o‘rin masalasini aniq qilib ulgurmaganimiz tufayli bugungi o‘yinda ham faqat g‘alaba uchun maydonga chiqdik. "Mash’al" yaxshi shakllangan jamoa, bu klubda kuchli murabbiylar shtabi jam bo‘lgan. Birinchi bo‘limda jamoamiz ko‘zni quvnatadigan darajada o‘yin namoyish etib berishdi. Yigitlar uchrashuv avvalida aytilgan barcha ko‘rsatmalarni to‘g‘ri bajarishdi. Ikkinchi bo‘lim bo‘yicha ayrim futbolchilarga e’tiroz bor. Bu borada ular bilan gaplashib olamiz. Futbolchi maydonda 90 daqiqa bor kuchini berib o‘ynashi kerak. Futbolni va stadionga tashrif buyurgan muxlislarni hurmat qilishi lozim. Natija balki ularning o‘yinini sustlashtirgan bo‘lishi mumkin. AGMK bilan o‘yindan avval ayrim futbolchilarga dam olish imkonini berish uchun zaxiralarga qo‘l urdik.
- Savol bugungi o‘yinga taaluqli emas. Lekin o‘zbek klublarining OCHL musobaqalarida muvaffaqiyatsiz ishtiroki yuzasidan qanday fikrlaringiz bor?
- Men murabbiy sifatida o‘z fikrlarimni bildirib o‘tishim mumkin. "Nasaf" yoki "Paxtakor"ni tanqid qilish fikridan yiroqman. Chunki bu jamoalarda kuchli murabbiylar ish olib borishadi. "Nasaf" o‘z o‘yinlari bilan yaxshi taasurot qoldirmoqda. Keyingi o‘yinlarda vakillarimizga omad tilab qolamiz. "Nasaf" va "Paxtakor" O‘zbekiston nomidan OCHL musobaqalarida ishtirok etishmoqda, ular bizning yuzimiz. Bu juda ko‘plab gapirilgan mavzular, bolalar va yoshlar futboliga e’tibor qaratish borasida muntazam aytib kelinadi. Bu yo‘nalishlarda hozirda yaxshi ishlar amalga oshirib kelinmoqda. Bu yaqin kelajakda o‘z mevasini berishiga ishonaman. Avvallari klublarimiz yarim finalga qadar yetib borishardi, hozir guruhdan chiqishning o‘zi muammoga aylanib qolmoqda. Bu vaqtinchalik xolat deb o‘ylayman. "Paxtakor" yaxshi jamoa, balki ular legioner tanlashda adashgan bo‘lishlari mumkin. Larin va Xadjiyev bir xil o‘yin namoyish etib bera olishmayapti. Jamoaning asosiy muammosi himoya chizig‘ida ekani ko‘rinib turibdi. Bu juda chuqur mavzu, hozir amalga oshirlayotgan ishlar kelajakda o‘z mevasini berishi kerak." - dedi Ashurmatov.
