Ўзбекистон кубоги мусобақасининг гуруҳ босқичи 3-туридан ўрин олган "Қўқон-1912" - "Машъал" (4:0) учрашувидан сўнг мезбонлар бош мураббийи Бахтиёр Ашурматов ўз фикрларини билдириб ўтди.
- Айтиб ўтгандим, гуруҳдаги биринчи ўрин масаласини аниқ қилиб улгурмаганимиз туфайли бугунги ўйинда ҳам фақат ғалаба учун майдонга чиқдик. "Машъал" яхши шаклланган жамоа, бу клубда кучли мураббийлар штаби жам бўлган. Биринчи бўлимда жамоамиз кўзни қувнатадиган даражада ўйин намойиш этиб беришди. Йигитлар учрашув аввалида айтилган барча кўрсатмаларни тўғри бажаришди. Иккинчи бўлим бўйича айрим футболчиларга эътироз бор. Бу борада улар билан гаплашиб оламиз. Футболчи майдонда 90 дақиқа бор кучини бериб ўйнаши керак. Футболни ва стадионга ташриф буюрган мухлисларни ҳурмат қилиши лозим. Натижа балки уларнинг ўйинини сустлаштирган бўлиши мумкин. АГМК билан ўйиндан аввал айрим футболчиларга дам олиш имконини бериш учун захираларга қўл урдик.
- Савол бугунги ўйинга таалуқли эмас. Лекин ўзбек клубларининг ОЧЛ мусобақаларида муваффақиятсиз иштироки юзасидан қандай фикрларингиз бор?
- Мен мураббий сифатида ўз фикрларимни билдириб ўтишим мумкин. "Насаф" ёки "Пахтакор"ни танқид қилиш фикридан йироқман. Чунки бу жамоаларда кучли мураббийлар иш олиб боришади. "Насаф" ўз ўйинлари билан яхши таасурот қолдирмоқда. Кейинги ўйинларда вакилларимизга омад тилаб қоламиз. "Насаф" ва "Пахтакор" Ўзбекистон номидан ОЧЛ мусобақаларида иштирок этишмоқда, улар бизнинг юзимиз. Бу жуда кўплаб гапирилган мавзулар, болалар ва ёшлар футболига эътибор қаратиш борасида мунтазам айтиб келинади. Бу йўналишларда ҳозирда яхши ишлар амалга ошириб келинмоқда. Бу яқин келажакда ўз мевасини беришига ишонаман. Авваллари клубларимиз ярим финалга қадар етиб боришарди, ҳозир гуруҳдан чиқишнинг ўзи муаммога айланиб қолмоқда. Бу вақтинчалик холат деб ўйлайман. "Пахтакор" яхши жамоа, балки улар легионер танлашда адашган бўлишлари мумкин. Ларин ва Хаджиев бир хил ўйин намойиш этиб бера олишмаяпти. Жамоанинг асосий муаммоси ҳимоя чизиғида экани кўриниб турибди. Бу жуда чуқур мавзу, ҳозир амалга оширлаётган ишлар келажакда ўз мевасини бериши керак." - деди Ашурматов.
